東張西望｜將軍澳星級幼稚園結業家長閉翳 年學費9萬8楊潮凱大讚有心辦學

今日係9月1日正式開學日，不過就係早幾日臨開學前，將軍澳一間幼稚園突然宣布停辦倒閉，令唔少家長手足無措。

將軍澳聯合基督教音樂幼稚園日前（27日）表示，因受財政壓力影響，幼稚園即時結束營運，並集中資源投放於繼續營運的UCM Wonderland Playgroup及UCM Academy。校方表示會聯絡已繳付8月學費的家長，退回8月四分之一學費。此外，校方表示將按合約條款賠償及遣散幼稚園部門的教職員，並轉介予區內友校。教育局表示，知悉事件後已即時與該幼稚園聯絡，稱據悉該校會協助受影響學生轉校。局方會向學校及學生提供適切意見及支援。

{{hket:inline-image name="202056826_1233367980438223_7963740864852174481_n.jpg"}}{{/hket:inline-image}}

無綫節目《東張西望》日前去到學校附近訪問家長，佢哋都表示震驚同唔知點算。學校面臨財困，而原來學費一啲都唔平，幼稚園標榜用音樂主導課程，學前班每年學費$80,000，10個月計平均要$7,900/月，而幼初班至小學預備班每年收$98,000。

有唔少星二代都係呢間學校嘅學生，包括：張嘉兒、胡諾言、楊潮凱同埋林芊妤嘅仔女，其中楊潮凱就大讚校方有心辦學，他表示：「學校好好，佢哋open day介紹係全港單層最大，設施配套完善。我好記得父親節老師教阿女手板印T恤，我去完party全日着住，好開心。校方create好多重要回憶畀我同囡囡，覺得好可惜同震驚，希望會有白武士出手救學校。」

另外，有人喺討論區指學校財困全因為業主，「我哋學校所在地，係喺一個高級、低密度住宅樓下嘅商場一樓全層。業主一直每月收緊超過100萬租金，我哋亦願意做開荒牛捱新場。而且除咗幼稚園，我哋亦投資咗整個幼兒教育配套，比如係playgroup同音樂課程。」Post主指業主多番留難，到2020年疫情爆發都係唔肯減租。有網民就認為學校當初選址唔搞清楚，無諗商場配套未必可以配合辦學，同時有網民對校方遭遇深表同情。